وزيراعظم پاران پاڪستان ۽ تاجڪستان جي وچ ۾ ٻطرفي دوستاڻي لاڳاپن کي وڌيڪ مستحڪم ڪرڻ جي عزم جو ورجاءُ، خطي ۾ امن ۽ خوشحالي جي لاءِ دهشتگردي جي خاتمي جي لاءِ تاجڪستان سان گڏجي ڪم ڪرڻ جا خواهشمند آهيون: محمد شهباز شريف

دوشنبي – 02 – جولائي (اي پي پي) وزيراعظم محمد شهباز شريف پاڪستان ۽ تاجڪستان جي وچ ۾ ٻطرفي دوستاڻي لاڳاپن کي وڌيڪ مستحڪم ڪرڻ جي عزم جو ورجاءُ ڪندي چيو آهي ته ٻئي ملڪ زراعت، صحت، تعليم، واپار ۽ سيڙپڪاري جي فروغ جي لاءِ گڏجي ڪم ڪندا، خطي ۾ امن ۽ خوشحالي جي لاءِ دهشتگردي جي خاتمي جي لاءِ تاجڪستان سان گڏجي ڪم ڪرڻ جا خواهشمند آهيون. اهڙن خيالن جو اظهار هن تاجڪستان جي صدر امام علي رحمان سان گڏ پريس ڪانفرنس ڪندي ڪيو. وزيراعظم محمد شهباز شريف چيو ته تاجڪستان ۾ اسان جو گرمجوشي سان استقبال ڪيو ويو. ائين لڳي ٿو ته اسان هڪ گهر کان ٻئي گهر آيا آهيون، اسان ڪيترين ئي مفاهمتي يادداشتن تي صحيحون ڪيون آهن، مفاهمتي يادداشتن تي صحيحون ٻنهي ملڪن جي وچ ۾ ٻطرفن لاڳاپن جي مضبوطي جو سبب بڻجنديون. انهن معاهدن تي صحيحن تي ٿورائتا آهيون، ان سان ڀائراڻا لاڳاپا مستحڪم ۽ تعاون ۾ اضافو ٿيندو. آئون توهان سان گڏجي ڪم ڪرڻ جو خواهشمند آهيان، دوستاڻي ۽ ڀائراڻي لاڳاپن کي نه رڳو مستحڪم ڪرڻ پر زراعت، صحت، سيڙپڪاري، واپار ۾ اضافي سميت مختلف شعبن ۾ تعاون ۾ وڌيڪ اضافي جي خواهشمند آهيون. هن چيو ته ٽرانسپورٽ ۽ گڊز ڪراچي بندرگاهه کان افغانستان جي رستي تاجڪستان تائين شين جي چرپر ٿي رهي آهي، چاهيون ٿا ته تاجڪستان ۽ پاڪستان جي وچ ۾ روڊ ۽ ريل نيٽ ورڪ وڌيڪ مضبوط ٿئي. تاجڪستان جي صدر ۽ وفدن جي سطح تي ملاقاتن دوران ٻنهي ملڪن جي وچ ۾ تعاون جي لاءِ مثبت ۽ نتيجاخيز ڳالهه ٻولهه ٿي، ٻنهي ملڪن جي وچ ۾ واپار ۽ سيڙپڪاري جا وسيع موقعا موجود آهن، واپاري ڪاٿي ۾ اضافي جي لاءِ سالياني بنيادن تي هدف مقرر ڪرڻ گهرجن. هن چيو ته اسان کي گهڻ رخا واپاري لنگهه ڳولڻ گهرجن، چين، تاجڪستان ۽ افغانستان جي وچ ۾ واپاري لنگهه جو حصو بڻجڻ جا خواهشمند آهيون. وزيراعظم چيو ته تاجڪستان ۽ پاڪستان دهشتگردي کان متاثر ملڪ آهن. پاڪستان ڪيترائي سال ان ناسور کي منهن ڏنو ۽ انساني زندگين ۽ معاشي نقصانن جي صورت ۾ وڏي قيمت ادا ڪئي. دهشتگردي جي خاتمي جي لاءِ پاڪستان اربين رپين جو معاشي نقصان برداشت ڪيو ۽ سوين جانيون قربان ڪيون. پوري پاڪستاني قوم دهشتگردي کان متاثر ٿي، پاڪ فوج دهشتگردي جو بهادري سان مقابلو ڪيو ۽ ان ناسور جي خاتمي جي لاءِ بي مثال قربانيون ڏنيون. هن چيو ته 18 – 2017ع ۾ اسان دهشتگردي جو خاتمو ڪرڻ ۾ ڪامياب ٿيا هئاسين جڏهن ته بدقسمتي سان اهو ناسور هاڻي ٻيهر اڀري سامهون آيو آهي، گڏيل ڪوششن سان اسان ملڪ مان دهشتگردي جي خاتمي جي لاءِ پرعزم آهيون. اسان چاهيون ٿا ته پاڪستان ۽ تاجڪستان دهشتگردي جي خاتمي جي لاءِ گڏجي ڪم ڪريون، اسان خطي ۾ امن چاهيون ٿا، امن سان خطي ۾ خوشحالي ايندي. وزيراعظم چيو ته غزه ۾ فلسطينين تي ظلم ڪيا پيا وڃن، غزه ۾ 40 هزار فلسطينين کي شهيد ڪيو ويو. پاڪستان جي مذمت ڪري ٿو. ڀارت جي غيرقانوني قبضي هيٺ ڄمون ۽ ڪشمير ۾ جيڪو ٿي رهيو آهي ان جي مذمت ڪريون ٿا. ڏکڻ ايشيا ۾ پائيدار امن جي لاءِ گڏيل قومن جي سلامتي ڪائونسل جي قراردادن موجب ڪشمير مسئلو حل ڪيو وڃي. ڪشميرين کي انهن جو عالمي سطح تي مڃيل خودمختياري جو حق ملڻ گهرجي. هن چيو ته اميد آهي ته ڪاسا – 1000 منصوبو ايندڙ سال مڪمل ٿي ويندو جنهن سان خطي ۾ خوشحالي ايندي. پاڪستان ۽ تاجڪستان سرڪاري پاسپورٽن ويزا کان ڇوٽ ڏيڻ جي ٺاهه تي صحيحون ڪيون آهن. ان موقعي تي پاڪستان ۽ تاجڪستان جي وچ ۾ مختلف شعبن ۾ معاهدن ۽ مفاهمتي يادداشتن تي صحيحون ڪيون ويون.

مضمون کا ماخذ : لیپریچون کی خوش قسمتی۔

متعلقہ مضامین